BAHASA MINANG: Galatiak

Mancaliak galatiak-galatiak urang-urang kini, lain lo sero e. Kadang-kadang, tak tapikie dek awak baa kok pandai urang mambuek galatiak sarupo itu?

Dulu raso e ilimu garik galatiak manusia ko bisa di takok je ka sadoalahe nye..... Kok tagak, pasti bantuak urang upacara bandera panjang je. Kok duduak, pasti tangan e balipek diateh meja bantuak sadang sakola panjang je.

Kok mangecek, pasti tagak siap, tangan bakapik malampok a nan paralu dilampok, tu kalua suaro bantuak sadang mambaco pancasila..... Caliak lah galatiak urang tagak caro kini.

Ado nan ba tenjak an ka suok, ado nan batenjak an ka kida, ado nan bakangkangan sa angin. Kok ado bandue, sangajo ba angkek kaki sabalah. Kok ado dindiang, basanda an ka lakang nan sabalah lai!....

Caro duduak bitu lo. Ado nan manyilangan ciek kaki ka pao kaki ciek lai. Ado nan manyilangan di mato kaki sajo. Ado nan duduak manyanda sa jadi2 e. Ado nan ma ereang ka kida jo ka suok. Ado nan manggalosoh bantuak urang ka lalok!..... 
Mangecek? Ba macam! Bisa incek mato e ta bulaliak2, bisa muncuang e pencoang2, bisa lihie e teleang2 kida suok, bisa pinggang e ba puta2 takah urang senam, bisa tangan e bantuak urang mamandu lagu indonesia raya di lapangan upacara!..... Nan jaleh, ragam galatiak tu tantu sasuai jo jaman kakinian. 
Urang nan banyak galatiak e, pasti banyak urang nan mancaliak. Sakurang e urang bantuak Karuik, sanang mancaliak caro urang tu manggalatiak. Kok ado juo urang nan mangecek co jaman saisuak, tagang, data, pasti tak ka mahengoang urang surang alah juo do!.....

Tapi kok ditanyo ka Karuik, dek coitu na tapana mancaliak e, lai batambah paham jo isi kecek e? A kiro2 kok lah ka jawek e? Kok Karuik sudah mandi mambasahan kapalo, pasti jawek e, lai lah, batambah paham den dek e! Kok alun mandi? Ndak masuak di den do, nan jaleh mancaliak galatiak e nan sero

Oleh: Novrial Kadispar Sumbar