BAHASA MINANG: Makan Ati

Baa kok ado istilah makan ati di sabuik-sabuik urang? Tiok ado nan mambuek ngilu ulu ati di kecek an makan ati. Tiok ado nan ndak katuju dek awak nan dikarajoan urang di kecek an makan ati. Tiok ado kandak nan ndak lapeh dikecek an makan ati. A lae? Sabuik je lah! Pokok e sado nan mambuek amba pusek pasti di kecek an mambuek makan ati mah.

Sabana e dek Karuik bukan pakaro ngilu, tak katuju, tak kandak awak nan jadi masalah. Tapi makan ati e tu ha! Nan jaleh dek Karuik, sagalo macam ati tu nan paliang manyalero. Kok ado diadok an urang goreang ayam, nan di cari pasti ati e. Kok ado diadok an urang randang, nan di kakeh pasti ati e.

Tak ado nan mambuek ngilu bagai makan ati tu do. Kalau pakaro parangai urang, sabana e tak usah di sabuik. Tu lai urang mah! Tak ado hubungan darah bagai jo awak do. Sadang lai anak surang, acok lo parangai e tak katuju dek awak. Sabuik lah parangai anak-anak surang-surang di jaman kini? Lai sarupo jo parangai awak dulu ka rang gaek? Jawek je lah surang-surang. Kok di tolong lo manjawek an beko abih berang lo dek ado lo nan tagisie beko.

Kok iyo ado hubungan antaro pangana nan tak sasuai jo ati, sabana e murah je ubek e nye. Jan masuak an ka ati! Tacaliak jo tadanga biaso tu mah. Tapikie salayang baa kok coitu jadi e biaso sajo lo tu nye.

Tapi jan diturunan lo dari kapalo tu ka ati nan dibawah tu lae. Ado iduang dibawah incek mato. Kok sampai nan tasakek tu di pangka iduang, lacik an bantuak salemo! Lah kalue, ilang sandek tu mah! Kok turun juo nyo lae, tibo di rangkuangan, kok bisa di batuak an, ajan batuak sa kareh-kareh e! Kok agak bagalintin nyo saketek, ujo bantuak mangaluaan dahak, sambue an kalua, lindang sandek tu mah!

Jadi jan sagalo e ka dibaok ka ati! Gambuang ati tu beko, tak tatampuang di dado, malatuih e bantuak benen oto lai talok? Rancak lah paliharo ati tu elok-elok, sariang a nan ka masuak ka ati, jan sampai di makan lo.

Oleh: Novrial, Kadis Pariwisata Sumbar