BAHASA MINANG: Masuak Puaso

Dek lah ka masuak puaso lo namo e, a kiro-kiro pancaliak an nan acok basileweran dimato awak surang-surang? Mako iko lo nan ditanyoan dek karuik, dek raso e ado juo nan mangganja mancaliak kurenah kawan-kawan di kampuang e ko.

Takuik bana Karuik kok inyo nan salah, kawan nan banyak tu nan bana, tabolok lo raso e dek salah mamikie an e.....

Partamo pai ka pandam pakuburan. Babagai kurenah kawan-kawan e nan nampak di pandam pakuburan tu. Nan partamo hampie sadoalahe mamakai baju hitam, mamakai cangmato hitam laweh sampai ka kaniang, mamakai tikuluek co urang arab, mamakai kupiyah co angku pakiah, bado'a sampai bacucuran aie mato, sudah tu?

Biaso lah, ba poto-poto!..... Antah dek Karuik iyo tak ba elemu, tiok pai ka pandam pakuburan, niek e nak mambarasiehan kuburan rang gaek je nye, bara talok. Kok gaya, a nan lakek sajo. Kok do'a, bialah tiok sudah sumbayang sajo.

Urusan tu lillahi ta'ala je lah, tak karajo manusia lo pakaro ma ukue-ukue do'a tu do. Dek Karuik, Tuhan tu tau sia nan ka nyo kabue an, sia nan indak ka nyo kabue an.....

Nan kaduo pakaro mintak mo'oh. Dek kawan-kawan e banyak lo nan ba hape rancak, bakutantang bunyi hape ko dek urang mamintak mooh, ba macam pidio, bamacam poto, bamacam tulisan, sahinggo iyo sabana tau lo urang sadoe bahaso awak iyo lai urang nan pamintak mo'oh.....

Dek iyo kurang elemu bana lo, nan mintak mo'oh ko dek karuik, iyo batamui urang tu, iyo bakecek an dari ati dikaluaan dek muncuang, di salami, di danga lo iyo lai dimo'ohan urang tu sado nan bapintak tu. Ka sado urang? Tantu ka nan jaleh-jaleh awak raso e ado salah, tantu ka urang2 nan awak pagauli tiok ari, ma tau ado gesoh jo lendo nan bajajak, ado tongek jo gisie nan mambakeh.....

Kok disamoan jo pamilu, mancaliak suaro nan banyak, lah jaleh Karuik nan sasek pangana mah, kawan nan banyak tu nan batue. Dek karano itu, dek lai ba hape lo, kok ado nan talendo jo tagisie, di susun jari nan sapuluah, di takuan kapalo nan satu, ampun kapado Allah, mo'oh ka nan maraso iyo dipintak lo yooooo.....

Oleh: Novrial, Kepala Dinas Pariwisata Sumatera Barat